ناوه‌ڕۆك
مامۆستای سەرکەوتوو بە چاوی کەسێکی تر قوتابیەکەی هەڵناسەنگێنێت
زۆر جار وا ڕێک دەکەوێت هەندێک لە قوتابیان گرفتیان لەگەڵ مامۆستایەک دەبێت و خۆشیان ناوێت، گوێگری بۆ ناکەن و ناچنە ژێر باری ڕێنماییەکانی، بگرە زۆرجاریش لە وانەکە ناچنە ژوورەوە، لەگەڵ گەیشتنی ئەم هەواڵە بە بەڕێوەبەر و دەستەی مامۆستایانی قوتابخانە، ئیتر هەموو مامۆستایان خۆیان دەکەنە خاوەنی گرفتە و لە کاتی چوونە ژوورەوەیان بۆ ئەو پۆلە، بە چاوێکی تاوانبارانە سەیری قوتابییەکان دەکەن، بە تایبەتی بۆ ئەو قوتابییانەی کە خاوەن کێشەکەن، بگرە جاری وا هەیە سەرکۆنەشیان دەکەن، کە ئەمەش لە شوینی خۆی نیە، چونکە هەڵسەنگاندنی مامۆستا لە لایەن قوتابیانەوە جیاوازە، ئەگەر قوتابیەک لە بەرامبەر مامۆستایەک هەڵە بکات لەوانەیە زۆر بە ئاسانی بە قسەی مامۆستایەکی تر داوای لێبوردن بکات، هەڵە کردن دیاردەیەکی ئاساییە، بەڵام گرنگ ئەوەیە لە ئاستی خۆی گەورە نەکرێت و درێژەی پێنەدرێت، دەبێت خۆمان دادوەربین و لە ڕوانگەی خۆمانەوە قوتابی هەڵبسەنگێنین، نەوەک بە قسەی کەسانی تر سزا بەسەر بەرامبەرەکەمان بسەپێنین، خۆ خزاندنە ناو کێشەی مامۆستایەک لەگەڵ قوتابییەکانی هەیەتی کارێکی تەندروست و زانستیانە و پەروەردەییانە نیە، چونکە ئەم خۆ بە خاوەن کردنە گرفتەکان خراپتر دەبن و داوەکە زیاتر ئاڵۆز دەبێت، زانایان باس لەوە دەکەن:( ئەگەر مامۆستایەک گرفتێکی هەبوو ئەوا بۆ ئەوانی تر بێدەنگ بوون باشترین ڕێگایە، ئەگەر نەیانتوانی ڕێگا چارەیەک بۆ کێشەکە بدۆزنەوە).
