ناوه‌ڕۆك
زانیاری فیلم
یەکێک لەو فیلمانەیە کە دروستکەری شەپۆلی نوێی سینەمای ئێرانە، لە دەرهێنانی (داریوش مهرجویی) و دووەمین فیلمیەتی، کاری نووسینی لەلایەن دەرهێنەر و (غلامحسین ساعدی) ـەوە کراوە لە ساڵی ١٩٦٩.
هەریەک لە (عەلی نەسیڕیان، جەمشید مەشایخی، پەرویز فەنیزادە) بەژداربووانی فیلمەکەن کە لە باشترین ئەکتەرەکانی مێژووی وڵاتی ئێرانن لە سینەمای کۆن و نوێدا.
فیلمی گاو یەکەمین فیلمی ئێرانی بوو کە جیهانی لە سینەمای ئێران ئاگادارکردەوە و بەتایبەت لە ئەوروپا زۆر بەباشی بەناوبانگ بوو کە دواتریش خەڵاتی فیستیڤاڵی ڤێنیزی بردەوە لە ساڵی ١٩٧١.
ناوەڕۆکی فیلمەکە لە چیرۆکێکی (غلامحسین ساعدی)ـیەوە وەرگیراوە بەناوی (عزاداران بیل) .
گاو لە ساڵی ١٩٧١ ـەوە لە سینەما و فیستیڤاڵەکانی وڵاتانی دەرەوە نمایش کرا بەبێ ژێرنووس، بەڵام کاریگەرییەکەی لە کان و بەرلین و ڤێنیز و مۆسکۆ و لەندەن و لۆس‌ئەنجلۆس و تەواوی ئیتاڵیا دەنگی دایەوە و لە سێ ڕاپرسی ڕەخنەگراندا بە باشترین فیلمی مێژووی سینەمای ئێران دانراوە کە لەکاتێکدا بەرهەمهات کە سینەمای ئێران تەنیا فیلمی لاواز و سێکسی هەبوو.
چیرۆک
چیرۆکی فیلمەکە باس لە پیاوێک دەکات کە مانگایەکی هەیە و زیاتر لەهەمووشتێک گرنگی پێ دەدات و خزمەتی دەکات، بەڵام ڕووداوێک بەسەر مانگاکەی دێت و خودی خۆی بیردەچێتەوە.
فیلمی گاو باس لە عەقیدە و بیروباوەڕی مرۆڤ دەکات کە گەر خۆی باوەڕ بە شتێک بهێنێت، کەس ناتوانێت ئازادی بکات خۆی نەبێت.
لێدوانەکان
فیلمی گاو دوای بڵاوبونەوەی کەسانێکی زۆر لەسەری دوان.
لەوانە:
- بە باشترین فیلمی مێژووی ئێران دانرا.
- لەلایەن محەمەد ڕەزا شای ئێرانەوە زۆر ستایش کرا.
- خومەینی ڕابەری شۆڕش و کۆماری ئیسلامی ئێران بە فیلمێکی فێرکار و کلتوری و پەروەردەیی دایناوە.
- لە ڕۆژنامە و گۆڤارە بەناوبانگەکانی ئێراندا بە پیاهەڵدان و جوانترکردنێکی زۆر ڕووبەڕوو بویەوە.
- چەند بەشێک لە فیلمی گاو یەکێکە لە وانەکانی کتێبی ئەدەبیاتی ساڵی سێیەمی قۆناغی ناوەندی قوتابخانەکانی ئێران.
خاوەنی خەڵاتی فیستیڤاڵەکانی (لاروشل و بەرلین و ڤێنیز و وەزارەتی ڕۆشنبیری و سپاس) ـە.
کاتی فیلمەکە ١٠٤ خولەکە و لە گوندێکی ناوچەی قەزوین تۆمارکراوە.