ناوه‌ڕۆك
ناساندن
پزیشکی ڤێتێرنەری (بە عەرەبی: طب بيطري، بە ئینگلیزی: Veterinary Medicine)، سەر بە بەشە پزیشکییەکانە، بریتییە لەو پسپۆڕییەی کە گرنگی بە ئاژەڵان دەدات لە ڕووی بایۆلۆجی و چۆنیەتی مامەڵەکردن لەگەڵ ئاژەڵان بەشێوەیەکی تەندروست و زانستی، هەروەها دەستنیشانکردنی نەخۆشی ئاژەڵان و دیاریکردنی چارەسەری پزیشکی و کەمکردنەوەی ئازارەکانیان، و پاراستنی سامانی ئاژەڵی.
پزیشکی ڤێتێرنەری ڕۆڵ و کاریگەری گرنگی هەیە لە سەر تەندروستی و هۆشیارکردنەوەی کۆمەڵگە و دیاریكردنی ئەو نەخۆشیانەی کە لە ئاژەڵەوە دەگوازرێتەوە بۆ مرۆڤ.
قۆناغەکانی خوێندنی پزیشکی ڤێتێرنەری
ماوەی خوێندن لە کۆلێژی پزیشکی ڤێتێرنەری پێنج ساڵە، خوێندکار لەماوەی ئەم پێنج ساڵەدا بە چڕوپڕی وانەکان دەخوێنێت، وانەکانی بە تیۆری و کردارەکین و قۆناغەکانی سەرەتا زیاتر تیۆرین، بەڵام لە قۆناغەکانی کۆتایی وانەکان زیاتر کردارەکین و ڕادەهێنرێن لەسەر چۆنیەتی مامەڵەکردن لەگەڵ ئاژەڵان.
خوێندکار لە دوای تەواوکردنی ماوەی خوێندن بڕوانامەی بەکالۆریۆس بەدەستدەهێنێت پاشان ئەگەر ویستی لە خوێندنی باڵا (ماجستێر و دکتۆرا) هەبوو دەتوانێت پەرە بە خوێندنەکەی بدات.
خوێندکاری ئەم بەشە ئەگەر لە قۆناغی یەکەمدا پلەی یەکەم بەدەست بهێنێت دەتوانێت بچێتە کۆلێژی پزیشکی گشتی.
ئەم بەشە پەیمانگایشی هەیە خوێندن بۆ ماوەی دوو ساڵە و لە دوای دەرچوون خوێندکار دەبێتە خاوەنی بڕوانامەی دبلۆم، وانەکان بە کورتی و خێرایی دەخوێنرێت، زیاتریش کردارەکیین.
سیفات و تایبەتمەندیی پزیشکی ڤێتێرنەری
- نەرمونیان و لەسەرخۆ بێت توانای مامەڵەکردنی هەبێت لەگەڵ ئاژەڵان.
- ئازایەتی و بوونی بوێری و نەترسان لە ئاژەڵ.
- توانای بڕیاردان و گرنگیدان بەکات.
- وردبین و گرنگیدان بە بچوکترین وردەکارییەکان.
بوار و پیشەی پزیشکی ڤێتێرنەری
- دەرچووی ئەم بەشە دەتوانێت کلینیکی تایبەت بە ئاژەڵان دانێت و چارەسەریان بکات.
- دەستنیشانکردنی نەخۆشییەکان بۆ هەموو جۆرە ئاژەڵێك.
- پزیشکی ڤێتێرنەری ڕۆڵێکی گرنگی هەیە لە دەستنیشانکردن و ڕێگری كردن له نه‌خۆشییه‌گوازراوه‌كانی نێوان مرۆڤ و ئاژەڵ.
- کارکردن وەکوو چاودێر و کۆنتڕۆڵکردنی زاوزێی ئاژەڵان لە ڕێگەی پیتاندنی دەستکرد.
- کارکردن وەکوو بەرپرسی خۆراکی ئاژەڵی.
وانە سەرەکییەکانی پزیشکی ڤێتێرنەری
ئەو وانانه‌ی له قۆناغه‌كانی خوێندن ده‌خوێنرێن ده‌كرێت گۆڕانكاری و جیاوازی زۆری تێدا بێت له زانكۆیه‌كه‌وه بۆ زانکۆیەکی تر دەگۆڕێت، خوێندکار ژمارەیەکی زۆر وانەی سەرەکی و گرنگی هەیە لەم بەشە گرنگترینیان:
| کوردی | ئینگلیزی |
|---|---|
| توێکاری | Anatomy |
| کۆرپەلەزانی | Emberiology |
| تەندروستی گۆشتی ئاژەڵان | Meay Hygine |
| تەندروستی شیرەمەنییەکان | Milk Hygiene |
| بەڕێوەبەردنی کێڵگەی پەلەوەڕییەکان | PoultryManagement |
| بەڕێوەبردنی ئاژەڵی | Animals Management |
| بۆماوەیی ئاژەڵان | Animals Breeding and Genetics |
| شانەزانی | Histology |
| فسیۆلۆجی ئاژەڵان | Animals Physiology |
| دەرمانسازیی ئاژەڵان | Veterinary Pharmacology |
| خۆراکی ئاژەڵی | Animals Nutrition |
| پزیشکی هەناوی ئاژەڵان | Veterinary Internal Medicine |
| نەخۆشییە گوازراوەکان | Veterinary Infections Diseases |
| زانستی ژەهرناسی ئاژەڵان | Veterinary Toxicology |
| نەخۆشییەکانی کێڵگە پەلەوەڕییەکان | Poultry Veterinary |
| نەشتەرگەری و زانستی وەچەخستنەوە | Surgery and Theriogenology |
| کیمیای ئەندامی و زیندەزانی | Chemical Organic and Bilogy Chemistry |
| بایۆلۆجی گشتی | General Biology |
گرنگترین زانکۆکانی هەرێم کە ئەم بەشەی تێدا دەخوێنرێت
- زانکۆی سلێمانی
- زانکۆی دهۆك
گرنگترین پەیمانگاکانی هەرێم کە ئەم بەشەی تێدا دەخوێنرێت
- زاخۆ
- کەلار
