ناوه‌ڕۆك
پێدانی دەرمان بە منداڵ
کێشەیەک کە هەموو دایکان هەیانە بریتییە لە پێدانی دەرمان بە منداڵەکەیان، چونکە دەبێت بە زۆر پێیان بدرێت و دایکەکە ماندوو دەکەن، گرنگە دایک چەند ڕێگایەک بەکاربهێنێت تاکوو خۆی و منداڵەکەشی بەم هۆیەوە بێزار نەبن.
چەند ڕێنماییەک بۆ پێدانی دەرمان بە منداڵەکەت
- پێش ئەوەی دەرمانەکە بدەیت بە منداڵەکەت دەبێت ڕای پزیشک وەربگریت لەسەر پێدان و تەواوی زانیارییەکانی دەرمانەکە.
- دەرمانەکان دوور لە منداڵەکەت دابنێ و با دەستی نەیگاتێ.
- کاتێک شروب دەدەیت بە منداڵەکەت سرنج بەکاربهێنە تاکوو بڕێکی تەواو و ڕاستی پێ بدەیت.
چۆن دەرمان بدەیت بە منداڵەکەت؟
- ئەگەر بە تەنها و بە بێ یارمەتی هیچ کەسێک دەرمان دەدەیت بە منداڵەکەت، دەتوانیت سەرەتا دەرمانەکە بکەیتە سرنجەکەوە و منداڵەکەت بخەیتە باوەشتەوە و جێگیری بکەیت، دواتر دەرمانەکە بکەیتە ناوەوەی دەمییەوە و دواوەی دەم و بەرەو لای ڕوومەتەکان، چونکە لەم شوێنانەدا هەستی تامکردن بوونی نییە و منداڵەکە هەست بە تامی دەرمانەکە ناکات.
- ئەگەر منداڵەکەت هەر نەیخوارد دەتوانیت دەرمانەکە لەگەڵ کەمێک شیری خۆت یاخود شیری وشک تێکەڵ بکەیت و پێی بدەیت، بەڵام نابێت بڕی شیرەکە زۆر بێت.
- سرنج باشترینە بۆ پێدانی دەرمان و دوای ئەوە بە جوانی بیشۆ و لە شوێنکی پاکدا هەڵیگرە.
- هەوڵبدە زوو دەرمانەکە بدە بە منداڵەکە و خاوە خاو مەکە لە پێدانیدا
- ئەگەر هیچ چارەیەک نەبوو زۆر جار واباشترە دوو کەس دەرمان بدەن بە منداڵەکە، کەسێک لە باوەشیدا دەست و قاچی بگرێت و ئەوی دیکە دەرمانەکەی پێ بدات تاکوو نەڕژێت.
- لە کاتی پێدانی دەرمانەکەدا قسەی بۆ بکە یاخود گۆرانی بۆ بڵێ و چیرۆکی بۆ بخوێنەوە، با خەیاڵی بڕوات و زووتر دەرمانەکە بخواتەوە.
- بۆ پێدانی قەترەی چاو بەدڵنییایەوە دەبێت دوو کەس بن چونکە چاو هەستیارە و دەبێت بە هەمان بڕ بێت کە پزیشک دیاری کردووە، کەسێکیان منداڵەکە بگرێت و ئەوی دیکە قەترەکە بکاتە چاوییەوە، دوای ئەوەی کە قەترەکەت کردە چاوییەوە ماوەیەک سەری منداڵەکە بەرەو دواوە ببە تاکوو قەترەکە بڕواتە ناوەوە و نەڕژێت.
- لە کاتی پێدانی قەترە بۆ گوێ منداڵەکە بخە بە لادا و دوای ئەوەی قەترەکەت تێکرد دەبێت چاوەڕێ بکەیت تاکوو بە جوانی قەترەکە دەچێتە ناوەوە ئینجا منداڵەکە بجوڵێنیت.