ناوه‌ڕۆك
ماوەی دەستگیرانداری
ماوەی دەستگیرانداری بەشێکە لە ماوەی هاوسەری کە لەگەڵ ئەو کەسەدایت بڕیارە ڕۆژێک پێکەوە بچنە ژێر بنبانێکەوە و بژین، ماوەیەکە تاکوو بتوانن زیاتر یەکتری بناسن، ئەو چەند مانگ یاخود چەند ساڵەی ماوەی دەستگیرانداری ماوەیەکی زۆر باشە تاکوو لە هەموو ڕوویەکەوە لە یەکتری تێبگەن و خۆتان ئامادە بکەن بۆ قۆناغی داهاتووی ژیانتان.
چەند ڕێنماییەکی گرنگ لەسەر ماوەی دەستگیرانداری
گوێ بە هەڵە تێگەیشتنەکان مەدەن
لە هەموو قسەکردنێکدا هەڵە تێگەیشتن ڕوودەدات و قسەیەک دەکرێت کە لایەنی بەرامبەر لێکدانەوەیکی تری بۆ دەکات و بە جۆرێکی دیکە لێی تێدەگات، لە نێوان دوو دەستگیراندا ئەمە زۆر ڕوودەدات، کاتێک بە هەڵە لە قسەیەک تێگەیشتیت و پێت ناخۆش بوو پرسیاری لێبکە کە مەبەستی چیبووە و بزانە ئایا تۆ بە هەڵە تێنەگەشتوویت، زۆرجار کەسی بەرامبەرت لە چاکەی خۆی شتێکت پێ دەڵێت و بەڵام شێوازی وتنەکەی بەو جۆرەیە کە بە هەڵە تێبگەیت لێی، بۆیە ئەمە زۆر ئاساییە و هەرگیز لەسەر هەڵە تێگەیشتنەکان دەنگە دەنگ مەکەن و زۆری لەسەر مەڕۆن و بە ئاسایی وەریگرن.
متمانەی پێ بکە
هەوڵبدە خۆت لەسەر ئەوە ڕابهێنیت کە متمانە بکەیت بە دەستگیرانەکەت، چونکە لە داهاتوودا ژیانت لەگەڵ ئەم کەسەدا دەبێت و ژیان بەبێ متمانە کردن چێژێکی نییە، ئەگەر هاتو متمانەت نەبێت بە وەفا و ڕاستگۆیی و خۆشەویستی هاوسەرەکەت ئەوا زیان دەدەیت لە پەیوەندییەکەتان، زۆرجار کاتێک کێشەیەکی گەورەشتان تووش دەبێت تەنها متمانەیە کە دەتوانێت بەیەکەوەتان بهێڵێتەوە.
بهێڵن دڵتان تەنگ ببێت بۆ یەکتری
خۆشەویست و ئاشقی یەکن و بۆیە حەز دەکەن کە هەمیشە لەلای یەکبن و پێکەوەبن، بەڵام ئەگەر بێت و هەموو چرکەیەکی ژیانتان پێکەوە بن ئەی کەی کاتتان دەبێت تاکوو ئەزموونی شتی جیاواز بکەن لە ژیانتاندا، فێرببن کە ئاساییە دڵتان بۆ یەکتری تەنگ ببێت و چەند ڕۆژێک یەک نەبینن، چونکە هاوسەرگیری بەو واتایە نایەت کە واز لە هەموو ژیات بهێنیت و تەنها بیرت لای هاوسەرەکەت بێت.
پاڵپشتی یەکتری بکەن
لە پەیوەندییەکی باش و جواندا هەردوولا، کاتێک کارێکی باش دەکەن دەبێت پاڵپشتی یەک بکەن و پیاهەڵدانیان هەبێت بۆ یەکتری و هەمیشە لە پشتی یەکبن، بە هەمان شێوە کاتێک هەر لایەکیان تووشی کێشەیەک دەبێتەوە خەمخۆر و یارمەتیدەری یەکبن بۆ چارەسەری کێشەکە.
وازهێنان بە واتای لاوازی تۆ نییە
وازهێنان لە شتێک بە واتای لاوازی و خۆبەدەستەوە دانی تۆ نییە، بەڵکوو بە پێچەوانەوەیە، گرنگترین شت ئەوەیە کە ڕاو و قسەی خۆت بەسەر کەسدا نەچەسپێنیت، کاتێک کەسی بەرامبەر ڕاکەی دروسترە قبوڵی بکە و وازبهێنە لە چەسپاندنی ڕای خۆت، یاخود زۆرجار بۆ ئەوەی کێشەکەتان گەورەتر نەبێت وازبهێنە و تۆ دەستپێشخەری بکە لە بابەتەکاندا.
خاڵە لاوازەکانی خۆتت قبوڵ بێت
هەردوولا چاوەڕێی باشترین ڕەفتار دەکەن لەیەکتری، هەردوولا مرۆڤن و هەڵە دەکەن بۆیە هەرگیز چاوەڕێی ئەوە مەبە کە خۆت و کەسی بەرامبەر هەڵە نەکەن و لەم پەیوەندیەدا هیچ کێشەیەکتان نەبێت، ئاساییە کە کەسی بەرامبەرت خاڵی لاواز و هەڵەکانی تۆ بزانێت و شەرم مەکە لە زانینی چونکە هەموو کەسێک کۆمەڵێک هەڵە و خاڵی لاوازی هەیە.
دەبێت هەندێک بابەت قبوڵ بکەیت
هەموو کەسێک ڕابردوویەکی هەیە و لێی پەشیمانە، بەڵام ناتوانێت بگەڕێتەوە و بیگوڕێت بۆیە بە ناچاری قبوڵی کردووە، هەندێک خاڵ هەیە لە کەسی بەرامبەردا کە ناگۆڕدرێت و پێویست دەکات کە ئەوە قبوڵ بکەیت، هەندێک کات ناتوانیت هەندێک شت بگۆڕیت ئەگەر چەند هەوڵیش بدەیت بۆیە مەرج نییە لەسەر هەموو بابەتێک کە بە دڵی تۆ نەبوو بیکەیتە شەڕ و ئاژاوە و هەندێک بابەت هەیە لە کۆتایدا دەبێت قبوڵیان بکەیت.
زوو و لە ناخی دڵتەوە لێی خۆشببە
کاتێک پێکەوە شەڕ دەکەن نیگەرانی ئەوە مەبە کێ دەیباتەوە و کێ دەدۆڕێت، لەو شەڕەوە ئەزموون و وانە وەربگرن و گیانی لێبووردەیتان هەبێت، کاتێک شەڕەکە تەواو بووە و هیچ ئەنجامێکی نەبووە زوو کەسی بەرامبەرت ببەخشە و کینە لە دڵ مەگرە، چونکە کینە لە دڵگرتن ژیانت وێران دەکات.
چاوەڕوانی زۆرت نەبێت
چاوەڕێی ئەوە مەبە کە هاوسەرگیریت کرد، هاوسەرەکەت بیری تۆ بخوێنێتەوە و ڕۆژانە بێت ژەمی بەیانیانت بۆ ئامادە بکات، نابێت چاوەڕێی کۆمەڵێک شت بیت لە کەسێک کە ئەنجامدانیشیان قورسە بۆ خۆت، کاتێک چاوەڕوانیت زۆر دەبێت ناتوانیت زوو ڕازی بیت و هەمیشە چاوت لەسەر شتی زیاترە.
هەستەکانتان دەرببڕن
گرنگترین کار بۆ پەیوەندییەکەتان دەربڕینی هەستەکانتانە و هەستەکانی خۆتان مەشارنەوە، کاتێک هەستەکانت دەردەبڕیت بەرامبەر زیاتر لێت تێدەگات و پەیوەندییەکەتان باشتر دەبێت.