ناوه‌ڕۆك
قۆناغه‌كانی ڕاگه‌یاندن
له‌پڕۆسه‌ی ڕاگه‌یاندندا زنجیره قۆناغێكی پێكه‌وه گرێدراو هه‌یه كه له نێره‌ره‌وه ده‌سپێده‌كات و وه‌رگر و ده‌نگدانه‌وه گۆتایی دێت، به‌م شێوه‌یه‌ی خواره‌وه‌ش دیاری ده‌كرێ:
له‌ڕووی نێره‌ره‌وه
-
قۆناغی هه‌ڵبژاردنی بیرۆكه
له‌م قۆناغه‌دا وه‌رگر ئه‌و بیرۆكه هه‌ڵده‌بژێرێ كه ده‌یه‌وێ دایڕێژێ و بۆ وه‌رگر بنێرێت، جا ئه‌و بیرۆكه‌یه چ ڕامیاری بێ، یا ئابوری، یاخود ڕۆشنبیری، یان كۆمه‌ڵایه‌تی، یا هونه‌ری، یاخود وه‌رزشی، یازانستی بێت.
-
قۆناغی به‌كۆدكردنی بیرۆكه
واته داڕشتنی بیرۆكه له‌شێوه‌ی هێمای نووسراو، وه‌كو له نامه‌ی پۆسته و هێمای ده‌نگی وه‌كو له‌قسه‌كردنی ئاسایی له‌گه‌ڵ كه‌سانیتردا.
-
قۆناغی ناردن
واته گواستنه‌وه‌ی په‌یام دوای داڕشتنی و دڵنیابوون له ڕاستی و ڕه‌وانی و نه‌بوونی هه‌ڵه‌ی ڕێزمانی و پێنوسی تێیدا.
له‌ڕوی وه‌رگره‌وه
-
قۆناغی وه‌رگرتنی په‌یام
له‌م قۆناغه‌دا وه‌رگر په‌یامه‌كه وه‌رده‌گرێ، جا چ په‌یامی ده‌نگی بێ، یان نووسراو، یاخود ئاماژه‌‌ی بێت.
-
قۆناغی كۆكردنه‌وه‌ی كۆد
له‌م قۆناغه‌دا وه‌رگر هه‌ڵده‌ستێ به‌كردنه‌وه‌ی هێماكانی په‌یامه‌كه له ڕیگه‌ی گۆڕینی هێماكان (وشه‌كان) بۆ بیرۆكه، لەبەر ئه‌وه‌ی وشه شاده‌ماری گواستنه‌وه‌ی بیرۆكه.
-
هه‌ڵوێست له‌په‌یامه‌كه
هه‌ڵوێستی وه‌رگر له‌په‌یامی نێره‌ر له میانی چوار خاڵه‌وه دیاری ده‌كرێ كه ئه‌مانه‌ن:
یه‌كه‌م: باوه‌ڕهێنان به‌و بیرۆكه‌یه‌ی كه وه‌رده‌گرێت.
دووه‌م: باوه‌ڕنه‌هێنان به‌و بیرۆكه‌یه‌ی وه‌ریده‌گرێت.
سێیه‌م: پشتگوێخستنی ئه‌و بیرۆكه‌یه‌ی كه وه‌رده‌گیرێت.
چواره‌م: پاشه‌كه‌وتكردن و زیادكردنی بیرۆكه‌كه بۆ گه‌نجینه‌كه.
