ناوه‌ڕۆك
دێفکۆن
دێفکۆن یان (Defense Readiness condition) کە بە کورتکراوەی DEFCON دەناسرێت، پەیامێکی ئاگادارکردنەوەیە لەلایەن هێزە چەکدارەکانی ویلایەتە یەکگرتووەکانی ئەمریکاوە، دێفکۆن سیستمێکە لەلایەن سەرۆکایەتی تەواوی هێزە چەکدارەکانی ئەمریکا و فەرماندەیی یەکگرتووی جەنگ دروستکراوە، ئەم کۆدە لە پێنج پلە پێکهاتووە لە ژمارە یەک بۆ ژمارە پێنج و دەرخەری حاڵەتی مەترسییە لەسەر ویلایەتە یەکگرتووەکانی ئەمریکا.
ژمارە پێنج کەمترین ئامادەییە و ژمارە یەک گەورەترین مەترسی و زۆرترین ئامادەییە و لە هەموو حاڵەتە سەربازییەکان بەکاردێت.
واتای ژمارەکان
| دێفکۆنی یەک | گەورەترین کاردانەوە | مەترسی جەنگی ئەتۆمی | گەورەترین پلەی ئامادەیی و ترس |
| دێفکۆنی دوو | بڵاوبوونەوەی خێرا | مەترسی هەبوونی جەنگی مووشەک و ئەتۆم | ئامادەییەکی نایابی هێزەکان و ئامادەبوونیان بۆ کارکردن لە ماوەی شەش کاتژمێر |
| دێفکۆنی سێ | پەلەکردن لە کاردانەوە | زیادبوونی ئامادەیی و وریایی هێزە چەکدارەکان | ئامادەکردنی هێزە ئاسمانییەکان لە ماوەی ١٥ خولەک |
| دێفکۆنی چوار | کاردانەوەی هێواش | زیادبوونی کۆکردنەوەی زانیاری و ڕێکخستنی زانیاریە هەواڵگرییەکان | ئامادەیی و شڵەژان زیاتر لە حاڵەتی ئاسایی |
| دێفکۆنی پێنج | ئاسایی | کەمترین حاڵەتی ئامادەیی | ئامادەیی ئاسایی |
دێفکۆنی دوو
قەیرانی مووشەکە کوبییەکان
کاتێک یەکێتی سۆڤیەت لە ساڵی ١٩٦٢ مووشەکە ئەتۆمییەکانی لە کوبا جێگیر کرد لە نزیک کەناراوەکانی ئەمریکا، حاڵەتی دێفکۆنی دوو ئامادەکرا بۆ هێزە ئاسمانییەکان و هێزەکانی دیکەش لە دێفکۆنی سێدا هێڵرانەوە.
ئۆپەراسیۆنی گەردەلوولی بیابان
لە ١٥/١/١٩٩١ لە جەنگی کەنداو سەرۆکایەتی هێزە هاوبەشەکان حاڵەتی دێفکۆنی دووی ڕاگەیاند لەبەر مەترسی بەکارهێنانی چەکی کیمیایی لەلایەن عێراقەوە کە دەبووە هۆی پێکدانانی ئەتۆمی لە نێوانیان.
دێفکۆنی سێ
جەنگی ئۆکتۆبەر
لە ٦/١٠/١٩٧٣ هەریەک لە میسڕ و سوریا هێرشێکی هاوبەشیان کردە سەر ئیسرائیل و لە ترسی دەستتێوەردانی یەکێتی سۆڤیەت ئەمریکا هێزەکانی لە حاڵەتی سێ هێشتەوە تا ئەوکاتەی جەنگ کۆتایی هات.
ئۆپەراسیۆنی پاول بونیان
دوای کوژرانی دوو ئەفسەری ئەمریکی لە سنووری نێوان کۆریای باکوور و باشوور، حاڵەتی ئەمریکا بۆ ئامادەیی کرا بە دێفکۆنی سێ لە کۆریای باشوور.
هێرشەکانی یانزەی سێپتەمبەر
لەکاتی هێرشەکانی یانزەی ئەیلوولی ٢٠٠١ وەزیری بەرگری ئەمریکا فرمانی کرد بە ئامادەیی لە حاڵەتی دێفکۆنی سێ و خۆئامادەکردن بۆ حاڵەتی دێفکۆنی دووش.
