ناوه‌ڕۆك
سەد وێنەکەی مێژوو
گۆڤاری تایم بڕیاری دا بە دانانی لیستێک بۆ بەناوبانگترین وێنەکانی مێژوو و لیستەکەش پێکهاتبوو لە ١٠٠ وێنە، بۆ ئەمەش لەگەڵ زۆرێک لە وێنەگر و وێنەزانانی جیهان کۆبوونەوە، لێکۆڵەرەکان دەڵێن: "هەندێک لە وێنەکانمان داناوە چونکە تاکن، هەندێکیان چونکە بیری مرۆڤیان گۆڕی، و هەندێکیش شێوازی ژیانمانی گۆڕی، بەڵام ئەوەی هاوبەشە لە نێوان هەموویان، ئەوەیە دەبنە هۆی گۆڕانکاری لە مرۆڤەکاندا".
| ناوی وێنە | کوڕی ئالبینۆ، بیافرا |
| ناوی وێنە بە فەرمی | Albino Boy, Biafra |
| ڕیزبەندی | چواردەیەم |
| جۆر | مرۆڤایەتی، برسێتی، کارەسات، مافی مرۆڤ |
| مێژوو | ١٩٦٩ |
| وێنەگر | Don Mccullin |
کوڕی ئالبینۆ
بیافرا، وڵاتێکە دەکەوێتە ڕۆژئاوای کیشوەری ئەفریقا و ساڵی ١٩٦٧ لە نەیجیریا جیابوویەوە، لە کەمتر لە سێ ساڵیشدا دەسەڵاتی بەسەر وڵاتەکەدا زاڵ بوویەوە و دەستی بەسەردا گرتەوە، لە ماوەی ئەو سێ ساڵەدا بیافرا و خەڵکە هەژارەکەی بەهۆی ناکۆکی و جەنگەوە بوونە جێی باسی جیهان بەهۆی ئەو وێنانەی بڵاودەبوونەوە و دەرخەری کارەساتی وڵاتەکە بوون، کە بەهۆی نەخۆشی و برسێتی و نەبوونییەوە ملیۆنان کەس مردن، وێنەگری بەریتانی وێنەیەکی لە ساڵی ١٩٦٩ بڵاوکردەوە کە بووە وێنەیەکی مێژوویی بۆ بابەتێکی جیهانی، وێنەی کوڕێکی ئالبینۆی ٩ ساڵ کە لە برسێتیدا جەستەی هیچی لێ نەمابوویەوە.
وێنەگری بەریتانی نووسیبووی: "ئەوەی کە منداڵێکی بێباوکی برسی بیافرایی بیت حاڵەتێکە پێویستی بە بەزەییە، بەڵام ئەگەر منداڵێکی برسی ئالبینۆ بیت شتێکە وەسف ناکرێت".
ئەم وێنەیە بووە هۆی ئەوەی وڵاتانی دیکە بشڵەژێن و بەخۆیاندا بڕۆنەوە، دوابەدوای وێنەکە تەوژمی ئاسمانی بۆ گەیاندنی خواردن و دەرمان و چەک دەستی پێکرد، وێنەگر وتی هیوادارم ئەم وێنەیە دڵ و ڕۆحی کەسە ئاسایشی و سەربازییەکان بشکێنێت کە هۆکاری ئەمە بوون.
