ناوه‌ڕۆك
ناساندن
پەیوەندی خاڵ بۆ خاڵ یان پۆینت تو پۆینت (بە ئینگلیزی: Point-to-point)، ئاماژەیە بۆ پەیوەندی لە نێوان دوو خاڵی کۆتایی یان نۆدێک لە نێتۆرکدا واتە بەستنەوەی دوو ئامێر بە ڕاستەوخۆیی بە یەکەوە. نموونەیەک بۆ ئەوە پەیوەندی تەلەفۆنییە، کە تێیدا دوو تەلەفۆن بە یەکەوە بەستراوەتەوە و لەلایەن پەیوەندیکەرێکەوە دەبیسترێت. ئەمەش بەراورد دەکرێت لەگەڵ پەیوەندی خاڵ بە چەند خاڵێک یان پەخشکردن، کە تێیدا زۆرێک لە ئامێرەکان دەتوانن هەمان زانیاری کە لەلایەن ئامێرێکەوە دەنێردرێت ببینن. نموونەی دیکەی پەیوەندییەکانی خاڵ بە خاڵ بریتین لە (leased lines) و ڕێلەی ڕادیۆیی مایکرۆوەیڤ (microwave radio relay).
هەروەها ئەم زاراوەیە لە تۆڕی کۆمپیوتەر و بیناسازی کۆمپیوتەردا بەکاردێت بۆ ئاماژەکردن بە وایەر یان پەیوەندییەکی تر کە تەنها دوو کۆمپیوتەر یان سووڕێک بەیەکەوە دەبەستێتەوە، بە پێچەوانەی تۆپۆلۆجی تری وەک پاس یان سویچی کرۆسبار کە دەتوانێت زۆرێک لە ئامێرەکانی پەیوەندی بەیەکەوە ببەستێتەوە. هەندێک جار خاڵ بە خاڵ بە P2P کورت دەکرێتەوە. ئەم بەکارهێنانەی P2P جیاوازە لە P2P بە واتای (peer-to-peer).
داتا لینکی بنەڕەتی لە پەیوەندی خاڵ بۆ خاڵ، میدیایەکی پەیوەندییە کە بە تەواوی دوو خاڵی کۆتایی هەیە و هیچ فۆرماتێکی داتا یان پاکەتێکی نییە. کۆمپیوتەرەکان خۆیان لە هەر دوو کۆتاییدا بەرپرسیارێتی تەواو لە فۆرماتکردنی ئەو زانیاریانەی کە لە نێوانیاندا دەگوازرێنەوە لە ئەستۆ دەگرن.
لینکە مۆدێرنەکان
لە تۆڕی کۆمپیوتەری مۆدێرندا زاراوەی پەیوەندییەکانی خاڵ بە خاڵ بە واتای پەیوەندییەکی داتای بێ وایەر لە نێوان دوو خاڵی جێگیردا دێت. سیگناڵی پەیوەندییەکان بە شێوەیەکی گشتی دوو ئاراستەیە و یان دەستڕاگەیشتنێکی فرەیی دابەشکردنی کات (TDMA) یان کەناڵە. ئەمە دەتوانێت بەستەرێکی ڕێلەی مایکرۆوەیڤ بێت کە پێکهاتووە لە گوێزەرەوەیەک کە تیشکێکی تەسک لە مایکرۆوەیڤەکان بە ئەنتێنای دیشێکی پارابۆلیکی دەگوازێتەوە بۆ دیشێکی پارابۆلیکی دووەم کە وەرگرە. هەروەها تەکنەلۆژیاکانی وەک لەیزەر لەخۆدەگرێت کە داتای مۆدێلکراو لەسەر تیشکی ڕووناکی دەگوازنەوە. ئەم تەکنەلۆژیایانە پێویستیان بە هێڵی بینینێکی بێ بەربەست هەیە لە نێوان دوو خاڵەکەدا و بەمجۆرە بەهۆی ئاسۆی بینراوەوە سنووردار دەکرێن بۆ مەودای نزیکەی ٦٤ کم.
تۆڕکردن
لە تۆڕێکی ناوخۆییدا، ناوەندەکانی دووبارەکەرەوە (repeater hub) یان سویچەکان پەیوەندی بنەڕەتی دابین دەکەن. کە وادەکەن ئامێرێک لەگەڵ تەواوی ئامێرەکانی تری هەمان سویچ پەیوەندی هەبێت. لە ڕوانگەی چینەکانی مۆدێلی OSI، هەردوو سویچ و ناوەندی دووبارەکەرەوە پەیوەندی خاڵ بە خاڵ لەسەر چینە فیزیکییەکە دابین دەکەن. بەڵام لەسەر چینی بەستەری داتاکان، ناوەندێکی دووبارەکەرەوە پەیوەندی خاڵ بە چەند خاڵێک دابین دەکات چونکە فرەیمەکە دەنێردرێت بۆ زیاتر لە یەک ئامێر، لە کاتێکدا سویچ پەیوەندی خاڵ بە خاڵێکی مەجازی دابین دەکات، بەڵام هەر فرەیمێکی یونیکاست تەنها دەنێردرێت بۆ کەسی مەبەست.
لەناو زۆرێک لە سیستەمی پەیوەندییە سویچکراوەکاندا، دەتوانرێت سووڕێکی هەمیشەیی دابنرێت. نموونەیەک لەوانەیە تەلەفۆنێک بێت لە هۆڵی پێشوازی بینایەکی گشتیدا، کە بەرنامە بۆ داڕێژراوە تەنها ژمارەیەک لێدەدات و وەردەگیرێت.
خاڵێک بۆ خاڵ بەرانبەر بە خاڵ بۆ مەڵتیکاست
گرنگە جیاوازی بکرێت لە نێوان ئەم دوو شێوازەی پەیوەندیکردندا، چونکە ئەم زاراوانە زۆرجار بە شێوەیەکی گۆڕاو بەکاردەهێنرێن. هەروەها دەتوانرێت پەیوەندی خاڵ بە فرە خاڵ (کە بە P2MP ناسراوە) وەک پەیوەندی یەک بۆ زۆر دابنرێت. چونکە لە کاتێکدا ئامێرێک دەتوانێت پەیوەندی لەگەڵ چەندین شوێن بکات. لە کاتێکدا زۆربەی بەرنامەکانی پەیوەندی خاڵ بە خاڵ بۆ پەیوەندیکردن بە هەردوو ڕێگاکە بەکاردەهێنرێن، سیستەمەکانی P2MP زۆرجار بەبێ کەناڵی گەڕانەوە دیزاین دەکرێن، بۆ ئەوەی وەڵامی چەندین وەرگر بدەنەوە. باوترین نموونەی ئەم جۆرە سیستەمە وێستگەیەکی ڕادیۆییە، کە بە بەکارهێنانی فرێکوێنسی ڕادیۆیی بۆ چەند ئامێرێک پەخش دەکرێت.
| پەیوەندی خاڵ بە خاڵ | پەیوەندی فرە خاڵ |
| کەناڵی پەیوەندی خاڵ بە خاڵ تەنها لەلایەن دوو ئامێرەوە بەکاردەهێنرێت. | کەناڵی پەیوەندیکردن لەلایەن چەندین ئامێرەوە بەکاردەهێنرێت. |
| تەنها کاتێک دەتوانرێت پەیوەندییەک دروست بکرێت کە هەردوو ئامێرەکە ئۆنلاین بن. | دەتوانرێت لە هەر کاتێکدا پەیوەندییەک دابنرێت، بەبێ گوێدانە ئەوەی کە ئامێرەکانی تر ئۆنلاین بن یان نا. |
| توانای تۆڕ بە تەواوی تەرخانکراوە بۆ پەیوەندی نێوان دوو ئامێری تایبەت. | تواناکە لە نێوان هەموو ئامێرە بەستراوەکاندا دابەش دەکرێت. |
| ئامێرێک داتا دەگوازێتەوە، لە کاتێکدا ئامێرەکەی تر وەریدەگرێت. | ئامێرێک داتا دەگوازێتەوە، لە کاتێکدا زۆرێک لە ئامێرەکانی تر دەتوانن وەریبگرن. (پەخش) |
| بەو پێیەی ئەمە کەناڵێکی پەیوەندی هاوبەش نییە، مەترسییەکانی ئاسایش و مەترسییەکانی پاراستنی نهێنی زۆر کەمترن. | وەک کەناڵێکی پەیوەندیی هاوبەش، دەتوانرێت ئاسایش و نهێنی پەیوەندییەکە بخرێتە مەترسییەوە، ئەگەر بە باشی کۆد نەکرێت. |
تایبەتمەندیەکانی تۆپۆلۆجی خاڵ بە خاڵ
- باندویثێکی بەرز
- بە ئاسانی ئامێرێک دەگۆڕدرێت بۆ ئامێرێکی تر
- خێراییی پەیوەندی
- چارەسەرکردنی کێشەکان تێیدا ئاسانە
- چاککردنەوەی ئاسان
- خاوبوونەوە کەمە
- شێوازی پەیوەندیکردنەکە سادەیە
- تێچووی کەم
نموونەی تۆپۆلۆژیای خاڵ بە خاڵ
- پەیوەندی نێوان تەلەفزیۆن و کۆنترۆڵ
- پەیوەندی نێوان سپلیت و کۆنترۆڵ
- بەستنەوەی دوو کۆمپیوتەر لە LAN
- پەیوەندی نێوان ڕاوتەرێک بە ڕاوتەرێکەوە
- پەیوەندی نێوان ڕاوتەر و وێستگەی کارکردن (workstation)
