ناوه‌ڕۆك
ناساندن
جینین ئەنتوانێت هێنیس پلاشایرت یان جێنین پلاسخارت (بە ئینگلیزی: Jeanine Antoinette Hennis-Plasschaert، بە عەرەبی: جينين هينيس بلاسخارت) سیاسەتمەدار و دیپلۆماتکاری هۆڵەندییە و لە یەکی تشرینی دووەمی ٢٠١٨ـەوە وەک نوێنەری تایبەتی سکرتێری گشتیی نوێنەرایەتی هاوکاریی نەتەوە یەکگرتووەکان بۆ عێراق کاردەکات، ئەندامی پارتی گەلە بۆ ئازادی و دیموکراسی. دوای هەڵبژاردنی پەرلەمانی ئەورووپا لە ٢٠ی تەممووزی ٢٠٠٤ وەک ئەندامی پەرلەمانی ئەورووپا بۆ گرووپی هاوپەیمانی لیبراڵ و دیموکراتەکانی ئەورووپا (ALDE) هەڵبژێردرا؛ لە هەڵبژاردنی پەرلەمانی ئەورووپا لە ساڵی ٢٠٠٩ دووبارە هەڵبژێردرایەوە.
دوای هەڵبژاردنی گشتیی ساڵی ٢٠١٠ وەک ئەندامی ئەنجوومەنی نوێنەران هەڵبژێردرا و هەمان ڕۆژ لە ١٧ی حوزەیرانی ٢٠١٠ وەک ئەندامی ئەنجوومەنی نوێنەران دەستبەکاربوو و دەستی لە ئەندامێتی پەرلەمانی ئەورووپا کێشایەوە.
دوای هەڵبژاردنی ساڵی ٢٠١٢ و دوای پێکهێنانی کابینەکە، کابینەی دووەمی ڕوتا پێکهێنرا و هێنیس پلاشایرت بوو بە وەزیری بەرگری. لە ٥ی تشرینی دووەمی ٢٠١٢، هەمان ڕۆژ کە وەک وەزیری بەرگری دەستبەکاربوو، دەستی لە پۆستی ئەندامی ئەنجوومەنی نوێنەران کێشایەوە. ئەو تا ئەو کاتەی لە ٤ی تشرینی یەکەمی ٢٠١٧ دەستلەکارکێشانەوەی وەک وەزیری بەرگری کاری کردووە.
دوای هەڵبژاردنی ساڵی ٢٠١٧ وەک ئەندامی ئەنجوومەنی نوێنەران گەڕایەوە، لە ٢٣ی ئازاری ٢٠١٧ تا ١٣ی ئەیلوولی ٢٠١٨ کاری کردووە.
تەمەنی سەرەتایی و پەروەردە
جینین ئەنتۆنێت پلاشایرت لە شاری هیرلێنی هۆڵەندا لە ڕێکەوتی ١٩٧٣/٤/٧ لەدایکبووە. خوێندنی ناوەندی لە کۆلێجی سانت ئەنتۆنی لە شاری گودا تەواو کردووە و لە ئەکادیمیای سکرتێریی ئەورووپا لە ئۆترێخت خوێندوویەتی.
لە ٢٧ی ئەیلوولی ٢٠٠٣ـەوە هاوسەرگیری لەگەڵ ئابووریناس ئێریک جان هێنیس کردووە و کوڕێکی هەیە.
پیشەی سیاسی
لە مانگی ئابی ٢٠١٨دا، هێنیس پلاشایرت لەلایەن ئەنتۆنیۆ گۆتێرێس سکرتێری گشتیی نەتەوە یەکگرتووەکانەوە وەک نوێنەری تایبەتی خۆی لە عێراق و سەرۆکی نوێنەرایەتی نەتەوە یەکگرتووەکان بۆ عێراق (یونامی) دەستنیشانکرا، بەمەش شوێنی یان کوبیشی گرتەوە.
چالاکی لە عێراق
لە مانگی کانوونی دووەمی ٢٠١٩دا، هێنیس پلاشایرت داوای کرد هەوڵی نوێ بکرێتەوە بۆ گەڕاندنەوەی هاوسەنگی مەدەنی و پارێزگاریکردن بۆ ئازادی قسەکردن. لە بەیاننامەیەکی هاوبەشدا لەگەڵ نوێنەرایەتی نەتەوە یەکگرتووەکان بۆ یارمەتیدانی عێراق (یونامی) بە توندی ئیدانەی کوشتنی دوو چالاکوانی لە مانگی ئاب و هێرشەکانی دژی کەسانی دیکەی لە شاری بەسڕەی باشوور کرد. داواشی کرد هەوڵەکان زیاتر بکرێن بۆ ئەوەی تاوانباران بدرێنە دادگا.
لە ٢٨ی کانوونی دووەمی ٢٠٢١ سەردانی کۆمسیۆنی باڵای سەربەخۆی هەڵبژاردنەکانی عێراقی کرد لە بەغدا. لە ٣١ـی کانوونی دووەمی ٢٠٢١ لە شاری تارانی پایتەختی ئێران چاوی بە عەلی ئەكبەر ویلایەتی كەوت و لەوێدا گفتوگۆی لەبارەی هەڵبژاردنی داهاتووی پەرلەمانی عێراق كرد.
